Şablon:Інформація/crh
Bizim faaliyetimiz
“Vikimedia Ukrayina” birinci nevbette, Vikimedia leyhalarında serbest bilgilerniñ yaratılmasına ve tarqaluvına yardım ete. Bunıñ içün biz:
- vikimektepler keçiremiz ve istekli er keske Vikipediyada ve diger Vikimedia leyhalarında tarir etüvni añlatamız;
- Vikipediyada maqale yazuv yarışlarını teşkil etemiz;
- fotoyarışlar teşkil etemiz, olar arasında: «Viki hatırlama seve», «Viki Yerni seve» ve digerleri, ondan da ğayrı foto yarışlarda eñ yahşı resimlerniñ sergilerini keçiremiz;
- oquv yurtlarında Vikipediya tasil programması kirsetilmesini ve desteklenmesini teklif etemiz;
- Kitaphaneler, galereyalar, arhivler, müzeylerni (BoGeMa) vikileyhalarında çalışmağa teşviq etemiz;
- serbest nağmeler yaratılması içün muzıka leyhalarını destekleymiz;
- er yıl bütün memleketniñ Vikimedia azaları içün Vikikonferentsiya keçiremiz;
- Ukraina qanunlarında serbest bilgilerni tarqatuvda yardım etecek deñişmeler yapılmasını destekleymiz (hususan, freepanorama.org.ua);
- Vikimedia cemiyetine yardım etemiz: Vikipediya maqalelerini inkişaf ettirüv içün foto ve yerli Vikiekspeditsiyalarğa qol tutamız, göñüllilerge treningler içün stipendiyalar beremiz, ukrain Vikipediyasında mevzulı aftalarğa qol tutamız ve ilâhre;
- Ecnebiy vikimediacılar içün tedbirler teşkil etemiz (meselâ, CEEM-2014, CEEM-2018) ve ukrain vikimediacılarını yabancı zenaatdaşlarınıñ tecribesini öğrenip almaları içün çet memleketlerge yollaymız.
“Vikimedia Ukraina” çalışmaları aqqında video (2024 s.)(2024)
Faaliyetimiz ve vikileyhalarımız aqqında yayınlar cedveli..
Neler teklif etemiz
“Vikimedia Ukrayina” em azalarına, em de istegi olğan başqa insanlarğa öz ğayelerini ömürge keçirmege yardım ete. Biz sizlerge böyle etip qol tuta bilemiz:
- Vikimedia leyhaları aqqında tedbirni keçirecek göñülliler yollaymız: olar sizge Vikipediyanıñ tarir etilmesini, bedava litsenziyalar ne olğanını ya da başqalarnıñ fotoresimleri ne içün izinsiz yayınlanmağanını añlatır;
- Vikipediyada ya da başqa vikileyhalarda mevzulı afta ya da maqale yazuv yarışını teşkil etmekte yardım etermiz;
- İnformatsion destek, fikirdeşlerni qıdıruv (bunı Vikipediya Meydanında, içtimaiy ağlarda da yapmaq mümkün), bu saytta ve teşkilâtnıñ blogında matbuat-relizlerni yollav vastasınen malümatnı yayınlav, matbuat-konferentsiyalar keçirüv);
- Mikrograntlar (meselâ, tedbirlerde fotoresim çeküv ya da edebiyat satın aluv içün) ve göñülliler içün treningler içün stipendiyalar; Vikimedia Fondunıñ grantlarını qazanmaq içün konsultatsiyalar;
- Fototehnika, skaner, printer, İnternette çalışuv içün yer (evelden añlaimaq kerek);
- Devlet müessiselerine resmiy muracaatlarda yardım (teşkilâtnıñ uquqiy adı, blankı, İdare başınıñ imzası, müüri olmaq kerek);
- Bank esabı (maddiy yardım köstermege azır olğan sponsorlar olsa).
Eger bizim ğayelerimiz ya da leyhalarımız sizlerni meraqlandırsa, ya da “Vikimedia Ukrayina” işiñizge yaraycaq olsa, biznen bağlanıñız. Bunı Cemaat portalında, ğayeler saifesinde ya da infowikimedia.org.ua adresine yazıp yapmaq mümkün.